Perfil

Rádio Timor Kmanek (RTK) nu’udar emissora católica Diocese Dili nian ho caráter de não lucrativo. Funcionamento ba emissora católica ida ne’e hahu lança iha loron 3 Março 1994 ho ninia capacidade transmissora AM 100 watts no frequência AM 1404 Khz, ho objetivo hametin valor cultura sociedade timor nian nu’udar murak mean nebé determina ema atu bele hatene oinsa haka’as-an hodi halo buat di’ak iha ema nia moris. Filosofia ida ne’e reflete iha RTK ninia lema “Hakbokar Timor Lorosa’e Nia Murak Mean Tuir Anin“.

Transmissão ba programa diário nian liu hosi frequência tipo rua mak hanesan AM 1404 Khz (operação hahu hosi tinan 1994 to’o 2015) no FM 98.5 Mhz (operação hahu hosi tinan 2000 até agora) ho capacidade transmissor 1000-5000 watts. Liu hosi capacidade transmissor hirak ne’e mak bele tulun cobertura ba programa RTK habelar quase to’o iha distrito sira iha território timor laran tomak.

Visão RTK nian mak “cria modelo sociedade ida iha nebé cidadão tomak haroman ho moral Cristã ho livre responsabilidade no consciência crítica hodi bele cuidado herança hosi valor cultura no espiritual nian hodi buka desenvolve valor hirak ne’e ba serviço interesse nacional ho espírito sincero ba democracia.”

Missão RTK nian mak “atu contribui ba desenvolvimento sociedade humana nebé orienta ba valor comum, no princípio fundamental sira nebé hetan abut iha Cristandade liu hosi encoraja ouvinte sira consciente ho sira nia dignidade, hanoin no compreende mos ema seluk, cultiva senso responsabilidade mútual no sai buras nu’udar ema livre liu hosi respeito ema seluk nia liberdade no capacidade iha diálogo.”

RTK nia finalidade no objetivo geral mak “fornece rádiodifusão serviço público nian iha area sira kona ba informação, educação, religioso no divertimento cultural tuir missão Igreja nian maibe iha nafatin interação dinámica ho assunto sira contemporâneo nian iha sociedade hodi servi loloos ba necessidade no interesse comunidade no indivíduo sira.” RTK ninia objetivo específico mak “atu promove bem comum ema nian hodi bele sai maduro espiritualmente, consciente liu tan ho dignidade humana, responsabiliza ba sira nia atitude humana, loke laran ba ema seluk liuliu ba sira nebé mukit no kbiit la’ek.”

RTK halo transmissão durante loron hitu ho oras sanulu resin nén (16) iha loron ida. Estrutura programa Geral RTK nian fahe ba iha categoria nén: Informação/notícia oras ida (6.25%), Educação Cívica oras nén (37.5%), Formação Religioso oras rua (12.5%), Promoção Cultural oras rua (12.5%), Divertimento oras ha’at (25%) no commercial oras ida (6.25%). Programa principal RTK nian mak educação cívica nebé representa opção fundamental hodi bele traduz iha doutrina social Igreja nian liu hosi kuda valor no princípio sira Cristandade nian iha ema nia neon hodi bele tulun sira hakat ba objetivo loloos tuir sira nia realidade.

Popular